Gintagan-duon ni anay senador Richard Gordon nga pwede gihapon magdumara hin motu proprio investigation an Office of the Ombudsman kasumpay ha anomaliya nga ginkakadabihan han mga infrastracture project han nasud.
Ine in ha kaluyo han mga serye han imbestigasyon nga gindudumara han magkaduru-dilain nga ahensya ngan sangay han gobyerno sugad han Department of Justice (DOJ), Independent Commission for Infrastructure (ICI), ngan an nauna nga pagdungog nga ginbuhat han Kamara de Representantes ngan han Senado.
Sumala kan Gordon, pwede gihapon magdumara hin kalugaringon nga imbestigasyon an Ombudsman ngan dayun nga magsalawad hin mga kaso, bisan paman kun ginhuhulat pa an resulta han imbestigasyion nga gindudumara han iba nga ahensya.
Duon pa han anay Senate Blue Ribbon Committee Chairman, dati na niya nga gintawagan an Ombudsman dida han senador pa hiya agud igduon nga magdumara hin constitutional anti-graft body ha kalugaringon hine nga bulag nga imbestigasyon, oras nga mayda nakit-an o napansin ine nga iregularidad.
Iginpananglitan han batikan nga senador an haros adlaw-adlaw nga ginatos-gatos nga milyon ka-piso an gingagawas han mga kontraktor kun diin guti nga kantidad la an kapital han mga ine, ngan pira hine in mas hamubo pa han usa ka-milyon.
Dinhi pala daw in matutudlok na han Ombudsman nga mayda iregularidad nga nahitatabo ha kalakaran han mga flood control project ha nasud.
