Nanawagan hi Senator Raffy Tulfo hin mas mahugot nga screening ha mga overseas Filipino workers (OFWs) nga ginkukuha kumo performers agud malikayan an human trafficking ngan prostitusyon.
Ha pagdungog han Senate Labor panel, gintagan duon ni Tulfo an kakulangan hin mahugot nga panginano ha mga aplikante nga entertainer nga iginpapadara ha iba nga nasud.
Dugang pa, kinahanglan siguraduhon han Technical Education and Skills Development Authority (TESDA) nga tinuod nga mayda kapas ha pagkanta o pagsayaw an mga aplikante, ngan dire la subay ha pisikal nga panlawas hini.
Ginmalatumat pa han senador nga damo nga OFW an naghuhuna-huna nga masulod la kumo performers an nahingangadto ha mga nightclub ngan nagigin biktima ngan trafficking o prostitusyon.
Sumala naman kan Department of Migrant Workers (DMW) Undersecretary Bernard Olalia, waray ha mandato han ahensya an mag-assess han kapas han performers, ngan aminado hiya nga dire sugad kamahigpit an presente nga ebalwasyon.
Ginsukna gihapon ni Tulfo an mga job advertisement ha social media nga nagbibiling hin “attractive, beautiful, sexy” nga aplikante para ha entertainer jobs ha abroad, partikular ha Japan, nga iginduon nga kinahanglan ini igpatanggal.
Kumo baton, ginmalatumat han DMW nga nakikigsumpayan hiras ha Meta ngan Tiktok agud tanggalon an mga illegal nga recruitment posts.
