NATIONAL – Maduon nga ginkondena han Office of the Civil Defense (OCD) an paggamit han Emergency Cell Broadcast System (ECBS) para ha pangangampanya yana nga national ngan local election. Ine in mahuman nga makakarawat hin mga report an ira buhatan nga damo nga residente tikang ha mga probinsya an nakakarawat hin mga mensahe nga gin aaghat hira nga igbotos an partikular nga mga kandidato.
Ha usa nga pahayag nga ginpagawas han OCD, gintagan-duon han ahensya nga mahugot nga igindidire ngan nga delikadao an paggamit han ECBS kumo kaparte han pangangampanya han mga nakandidato yana nga piniliay.
Subay ha ahensya, an ECBS in dire gingagamit ha pangangampanya ngan para la ha paghahatag hin mga impormasyon nga live-saving alerts kada emergencies sugad han linog, bagyo, ngan pira pa nga mga sitwasyon nga pwede makaapekto ha seguridad han publiko.
An paggamit hine ha political purposes in posible nga makaapekto ha panhatag hin mga emergency alerts ngan posible magin immitent threat ha kinabuhi han mga residente nga Pilipino.
Samtang, ginpahinumduman naman han ahensya an mga kandidato nga an ECBS in gingagamit para ha mga urgent emergency notifications ngan dire para gamiton kumo campaign platform mahitungod nga pwede daw ine nga pagtikangan han pagkalipong, labi na kun umabot an mga duro nga krisis ha nasud.
