TACLOBAN CITY – Padayon an ginhihimo nga monitoring han Office of the Civil Defense OCD-8, ha bug-os nga Sinirangan Bisayas matungod na gihapon ha waray wantas nga pag-inuran.
Sumala kan Sher Rysiah Saises, Information Officer han OCD-8, nga hapagkayana mayda na hira nahereport nga ginpailarom ha state calamity sugad hiton Dolores, Can-Avid ngan San Miguel Leyte.
Samtang kanselado na gihapon an mga biyahe ha pira nga pantalan ha may Ormoc to Cebu, Supercat ngan Oceanjet.
Dugang pa han mao nga opsiyal nga padayon gihapon an ira monitoring ha mga kakarsadahan nga kutob yana in dire la gihapon naagi-an han mga bihekulo, an mga ine in ha may Biliran- Naval nga section road ngan ha may Catmon Detour Bridge, kalakip dinhi an Naval- Caibiran Cross Country road ha may sitio Macalpe.
Ginbabana-bana naman nga maabot na ha 7, 522 nga pamilya an apektado ha Eastern Samar, 213 nga pamilya naman ha Northern Samar, sobra 2,300 ha Samar ngan 3,712 ha Leyte.
Mayda na gihapon nagpatuman hin kanselasyon han klase ngan trabaho ha magkalain-lain nga lugar ha rehiyon.
Hapagkayana, padayon pa nga nakaka-abat hin pagbabaha an mga masunod nga lugar:
Eastern Samar : (Can-Avid, Maslog, Taft Buray road, Arteche, Jipapad, San Julian, Oras, Borongan, Laurente, Dolores).
Northern Samar : (Las Navas, Rawis, Catubig, Laoang, Capul, Mondragon, Bobon, Lope de Vega, Catarman, Silvino Lubos, ngan Pambujan).
Samar : (Catbalogan, Sta. Rita, San Jorge, Gandara, ngan Basey Samar).
Leyte: (Tigbao- Sta. Fe road, San Miguel, Burauen, Tacloban, ngan an Palo Leyte).
