TACLOBAN CITY – Patay an usa nga gintutuuhan myembro han New People’s Army ( NPA ) ha nahitabo nga engkwentro ha Brgy P. Rebadulla, Catubig, Northern Samar.
Ha press statement nga ginpagawas han 20th Infantry Battalion, ginkaengkwentro han mga kasundaluhan an masobra 10 nga mga rebelde samtang nagdudumara hira hin pursuit operation.
Humagos hin 5 minutos an balyuay hin bala ha magkaluyo nga panig kon diin nagresulta ini ha kamatayon han gintutuhan nga rebelde.
Waray naman nahipatik nga samaran o casualty ha tropa han gobyerno.
Mahuman an engkwentro, narekupo hiton militar an usa (1) nga KG-9 submachine gun nga may usa nga magazine ngan upat (4) nga bala hin 9mm.
Waray naman pangilal-an an gintutuuhan nga rebelde ngan waray liwat ini panapton han nahitabo an engkwentro.
Nagtutuo an militar nga an panapton hini in nakadto ha sakob han 20 nga mga backpacks nga ira narekober mahuman nga madiskubrehan han mga sundalo an ira kampo.
Mababaruan nga dida han nakalabay nga Abril 23 nakaengkwentro han 20th IB an mga NPA kon diin iba iba nga kalibre hin pusil ngan mga personal nga gamit an ira narekupo tikang ha ginbayaan nga kampo han mga rebelde.
