TACLOBAN CITY – Patay an usa nga myembro han New People’s Army samtang pipira pa nga mga rebelde an samaran ha nahitabo nga engkwentro ha butnga han mga kasundaluhan ngan han terorista nga grupo ha Las Navas, Northern Samar kagab-i.
Sumala ha report tikang ha Philippine Army, nahitabo an engkwentro banda alas 9 han kagab-ihon ha Barangay Tagan-ayan han magresponde an mga sundalo ha report han usa ng concern citizen nga mayda armado nga rebelde ha ira lugar.
Umabot hin 10 minutos an balyuay han buto han duha nga kampo kon diin waray nahipatik nga casualty o samaran ha panig han 20th Infantry Battalion.
Mahuman an engkwentro narekober han militar an usa nga submachine gun, usa nga magazine ngan siyam nga rounds hin 9mm “ball ammunition” tikang ha encounter site.
Gamit an helicopter han Philippine Airforce, gindara han mga sundalo an patay nga lawas han namatay nga NPA ha PNP Las Navas para hin proper disposition.
Ha ginpagawas nga statement han 20th Infantry Battalion, gindara daw an mga samaran nga rebelde ha rural health unit ngan ha Catubig Hospital para medical attention.
Mahugot naman an ira ginbubuhat nga koordinasyon ha mga kapulisan para ma-track down an kinamumutangan han mga rebelde agud nga madakop an mga ini ngan mapasakahan hin kaangayan nga kaso.
Labot la hini, mas ginpakusog han mga kasundaluhan an ira operasyon ala kontra ha mga rebelde tungod na gihapon han mga report nga nagpoprubar daw an mga ini nga mangolekta hin “permit to campaign fees” tikang ha mga pulitiko.
Mababaruan nga sunod sunod an nahipatik nga pan-atake han mga rebelde ha Las Navas han nakalabay la nga bulan.
Dida han nakalabay nga Abril 25, ginpatay han mga NPA an usa nga kapitan nga kilala kumo supporter han militar samtang sakay ini hin motorsiklo.
Ginsundan liwat ini han pagkamatay han usa nga 10 anyos nga bata mahuman nga maigo han gin-itsa nga bomba han mga rebelde.
Han nakalabay nga Abril 16, duha liwat nga sundalo an ginpatay han mga rebelde samtang nag iinspeksyon han ginbubuhat nga PAMANA road project ha boundary han Brgy. San Antonio ngan Catotogan bungto han Las Navas.
