SAMAR — Plano ni Samar Governor Sharee Ann Tan nga pahuruhuguton an paghahatag hin business ngan building permits ha mga negosyo ha probinsya.
Sumala kan Tan, diri na tutugutan nga mag-operate an mga negosyo o establisyemento nga waray kalugaringon nga parking area, agud malikayan an mabug-at nga trapiko ha Maharlika Highway.
Usa ha mga rason han trapiko ha Maharlika Highway ha Samar in an mga sarakyan nga nakaparada ha ligid han karsada, labi na ha mga lugar nga damo an establisyemento pero waray paradahan.
“Sana matulungan din tayo ng mga mayors na kung magbibigay ng business permit at building permit, dapat automatic na may parking area. Kasi kapag walang parking area ang establishment, automatic sa kalsada talaga malalagay...,” pamahayag ni Tan.
Sumala pa han opisyal, importante an mahugot nga koordinasyon han probinsyal nga gobyerno ngan han mga lokal nga panggobyernohan (LGUs), agud masigurado nga nasusunod an sakto nga land use ngan traffic management policies.
Dugang pa niya, an pagkakamay-ada hin parking area in diri la responsibilidad han gobyerno kundi obligasyon gihapon han mga negosyante, labi na an mga nahimumutang ha karsada han National Highway.
Pinaagi han mas mahugot nga regulasyon ha paghatag hin permits, malilikayan an illegal parking, mas tuhay an dalagan han trapiko, ngan mas magigin talwas an mga motorista ngan pedestrian.
Padayon naman an panawagan han Pamahalaang Panlalawigan ha mga lokal nga opisyal ngan negosyante nga makig-koordinar basi maresolba an problema ha trapiko, labi na ha mga pangunahon nga kalsada han Maharlika Highway. #
