TACLOBAN CITY – Gindeklara nga persona non-grata an grupo nga New People’s Army (NPA) ha lugar han San Isidro ngan bungto han Calubian, Leyte.
Ini in kasumpay han gindumara nga peace rally kaupod an mga Kasundaluhan, LGU han San Isidro ngan Calubian, mga stakeholders ngan iba pa ha gindumara nga peace rally dida ha nakalabay nga adlaw.
Sumala kan 1st Lt Milbert Ryan Raagas, Commanding Officer han 802nd Infantry Brigade, nga mahugot nga ginkokondina han mga katawhan han mao nga lugar ha mga NPA ngan ginyakan hini nga nadiri na hira hin kasamok.
Ginpangunahan naman an pagsukna han mismo alkalde han San Isidro nga hi Remedio Veloso ngan Mayor Marciano Batiancela Jr han Calubian kaupod an pira nga mga opisyales.
Komo pagpakita hin pagsukna in nagsunog an mga ini han Bandera han kanan walhanun nga grupo.
Samtang, utro nga nanawagan an Armed forces of the Philippines (AFP) ha nasasalin pa nga walhun nga grupo o kun New People’s Army nga summurender ha ira.
Sumala kan 1st Lt Milbert Ryan Raagas, Commanding Officer han 802nd Infantry Brigade, nga mismo na ngani an ira Brigadier General nga hi Lope Dagoy in nagpatapod nga abre hira para han mga walhun nga grupo nga magbalik loob ha gobyerno agud nga magkamay-ada an mga ini hin mahimyang nga kinabuhi kaupod an ira tagsa nga mga pamilya.
Sumala pa hini nga dapat in diri mahadlok an iba pa nga mga walhanun nga grupo tungod nga sinsero daw an gobyerno han ira panawagan ngan pitad nga mabuligan an mga rebelde nga magbag-o an ira kinabuhi.
Sumala pa kan Lt Raagas nga mismo na an Presidente Rodrigo Duterte an nagyakan nga matatagan hin maupay nga kinabuhi an walhanun nga grupo ingkasi nga summurender la an mga ini ha gobyerno.
Kaparte han ira programa han peace and development an paghatag hin cash ngan livelihood assistance pinaagi han TESDA ngan E-clip.
Mababaruan nga maabot ha 1, 200 nga mga Supporters han New Peoples Army o kun Militia ng bayan an nagpakita hin suporta ha pagtipa na han mga aktibidad han rebelde nga grupo.
