Igpapailarom ha full alert an bug-os nga National Capital Region (NCR) tikang ha Lunes kadungan han pagtitikang han impeachment trial ni Vice President Sara Duterte.
Ginkumpirma ini ni National Capital Region Police Office (NCRPO) chief PMGen. Anthony Aberin.
Dugang pa hini, tikang ha presente nga heightened alert status, utro nga igpapahitaas an lebel han kaandaman han kapulisan mahuman an tulo kaadlaw nga gios-protest han Iglesia ni Cristo (INC).
Subay ha NCRPO, nagin mahimyang an pankabug-usan nga gindumara nga katitirok han INC ha kaluyo han tensyon nga nahipatik ha syahan nga adlaw han rally ha EDSA People Power Monument.
Waray daw gihapon nahipatik nga dako nga insidente o aksidente han igbalhin an gios-protesta ha Liwasang Bonifacio ha Maynila.
Samtang, ginmalatumat han Philippine National Police (PNP) nga nakaandam na an ngatanan han security preparations para ha impeachment trial han bise presidente.
Maabot ha 6,000 nga kapulisan an igde-deploy ha palibot han Senado agud siguraduhon an kahapsay ngan seguridad ha pag-aabri han hearing.
Sumala kan PNP Public Information Office chief PCol. Allen Rae Co, iginmando ni PNP chief PGen. Jose Melencio Nartatez Jr. ha ngatanan han kapulisan nga magpabilin nga disiplinado, waray gin uugupan, ngan nakapulos ha paghahatag hin serbisyo-publiko.
