Nakatalaan nga ig atubang han House prosecution panel an masunod hini nga testigos yana nga adlaw, Hulyo 13, para ha pagpapadayon han impeachment trial kontra kan Vice President Sara Duterte kasumpay han imbestigasyon han National Bureau of Investigation (NBI) ha gin aalegar hulga kontra ha kinabuhi nira Presidente Ferdinand Marcos Jr., First Lady Liza Araneta-Marcos, ngan anay House Speaker Martin Romualdez.
Sumala kan House prosecution spokesperson ngan Lanao del Sur Rep. Zia Alonto Adiong, nakatalaan nga tumestigos hi Atty. Jeremy Lotoc, Regional Director han NBI-Bangsamoro Autonomous Region in Muslim Mindanao (BARMM).
Ginmalatumat ni Adiong nga maghahatag hin Lotoc hin resulta han gindumara nga imbestigasyon han NBI kasumpay ha nasabi nga insidente.
An testimonya ni Lotoc in ginlalauman nga magpapadayon ha nauna nga pag-atubang ni NBI Senior Agent John Mark Calilung, nga nagpamatuod ha pagigin ‘authentic’ han mga video recording ngan digital files kasumpay han pahayag ni Duterte dida han Nobyembre 23, 2024.
Ha nasabi nga video, nahipatik nga ginmalatumat han Bise Presidente nga mayda na hiya gin kontrata nga tawo agud patayon hi Presidente Ferdinand Marcos Jr., First Lady Liza Araneta-Marcos, ngan anay House Speaker Martin Romualdez ha oras nga hiya in mapatay.
Sumala kan Adiong, hi Lotoc an magbubuyagyag han resulta han imbestigasyon han NBI kasumpay han gin aalegar nga hulga. Sugadman, waray na ini magpahayag hin kadungan nga detalye mahitungod ha nagpapabilin nga sub judice rule.
Iginpaumaya naman han House prosecution panel ha Senado an pagdungog ha testimonya ni Lotoc kumo kaparte han pagpapadayon han presentastyon han ebidensya kontra kan VP Duterte.
Nakasentro an impeachment case ha gin aalegar grave threats nga iginsusumpay ha pahayag han Bise Presidente ha usa nga online press briefing dida han Nobyembre 23, 2024.
