Gin kumpirma han National Bureau of Investigation (NBI) nga authentic ngan dire himo han artificial intelligence an nagsasarang nga “kill threat” video ni Vice President Sara Duterte kontra kanda Presidente Ferdinand Marcos Jr., First Lady Liza Araneta-Marcos, ngan anay House Speaker Martin Romualdez.
Ha pagdungog han House Committee on Justice, ginmalatumat ni NBI Agent John Mark Calilung nga nagpailarom ha mahugot nga panginano an nasabi nga video ha ilarom han Affidavit of Authentication of Digital Evidence.
An video in ginbuhat dida han Nobyembre 23, 2024, kadungan han pagkaka-detine han Chief of Staff han Bise Presidente nga hi Zuleika Lopez mahuman ma-contempt ha Kamara de Representantes.
Utro nga ginpagawas an nasabi nga video ha impeachment proceedings, kun diin nabatian an hi Duterte nga nagbul-iw hin mga magbug-at nga pahayag ngan panarhog kontra ha mga nasabi nga opisyal.
Sumala pa kan Calilung, nakigsumpayan an NBI ha Meta agud mapreserba an orihinal nga kopya han video, kaupod an URL, screen recording han livestream, ngan hash value computation—usa nga digital “fingerprint” nga nagbaba-o kun na-edit an file.
Samtang, ginmalatumat ni NBI Director Melvin Matibag nga padayon an ira imbestigasyon agud matudlok an ginpapahayag nga indibidwal nga ginkaistorya han bise presidente kasumpay han panarhog.
Dugang pa hini, kalakip ha mga gin iimbestigahan an pira nga indibidwal nga mayda harani nga koneksyon ha bise presidente, kaupod an mga prsente ngan anay membro han Vice Presidential Security and Protection Group (VPSPG).
Subay ha imbestigasyon han NBI, iginkokonsidera nga seryoso an nasabi nga hulga sanglit nagpasaka hira hin kaso nga grave threats ngan inciting to sedition.
Padayon naman nga ginpapanginano han mga otoridad an kahiluag han insidente, labi na nga dabi dinhi an ikaduha nga pinakahitaas nga opisyal han nasud.
