NATIONAL – Gin pahayag han legal counsel han mga biktima han extra judicial killings (EJK) ha ilarom han war on drug nga gin baribaran han mga prosecutor han International Criminal Court (ICC) an request ni anay Pangulong Rodrigo Duterte para ha interim release mahitungod nga ginbag-o han defense team an nasud nga pagdadad-an ha anay presidente.
Gin kumpirma ni Atty. Gilbert Andres nga inisyal nga nakahimangraw han mga prosecutor kaupod an mga abogado han anay Presidente an member country han ICC nga makarawat ha anay Presidente ha oras nga tugutan an iya temporaryo nga kagawasan.
Igin eksplikar gihapon ni Atty. Andres nga ginbaribaran han prosecutors an interim release han anay presidente ha proposed host country mahitungod nga sobra hin ka-time consuming ngan kumplikado para ha pag-atubang han anay presidente ha korte mahitungod ha kahirayo o distansya han nasabi nga nasud tikang ha The Netherlands, labot pa ha pira nga grounds nga gintudlok han prosekusyon para baribaran an interim release han anay presidente.
Samtang, nakatalaan naman nga magsalawad hin mosyon an parte han mga biktima han EJK para baribaran an interim release han anay Presidente.
Ginlalauman naman nga magpapagawas hin desisyon han ICC ha katapusan nga semana han Agosto o syahan nga semana han Setyembre.
