NATIONAL – Ada na ha 314,785 nga kaso han dengue an nahipatik ha nasud dida han Oktubre han presente nga tuig, subay ha Department of Health.
Sugadman, ginmalatumat gihapon han DOH nga umubos an kaso han dengue, kun diin dida han Setyembre 29 kuton Oktubre 12 in nagkamay-ada hin pag-ubos nga 8%.
Subay pa ha ahensya, umubos an ihap han mga namamatay yana nga tuig kumpara dida han nakalabay nga tuig ha kaparehas nga panahon.
Samtang, mahitungod han tag-uran ngan dako an tyansa han pan-munay han mga namok in ginsigurado han DOH ha publiko nga naka-andam an ira pasilidad para hine.
Agud malikayan an kaso han dengue in padayon an pakikigsumpayan han ahensya ha mga local government units kun diin gin-aaghat hine an publiko nga magsul-ot hin mga bado nga makakatahon ha ira panit o gumamit hin mga mosquito repellant.
Gin abisuhan gihapon ni Health Secretary Ted Herbosa an publiko nga pumakadto ha pinakahirani nga health facility para magpakunsulta kun maka-eksperyensya hin sintomas han dengue.
