TACLOBAN CITY – Padayon nga gintatambal ha ospital an usa nga sundalo mahuman nga mapusil hin usa nga miyembro han CAFGU ha Brgy. 5 Calbiga, Samar.
Sumala kan PO3 Erwin Ilagan Bernal, Investigator han Calbiga Municipal Police Station, ginkilala an biktima nga hi Private Anthon Balledo, 23 anyos an pangidaron, miyembro han 63rd Infantry Battalion, ngan residente han mao nga lugar.
Samtang ginkilala naman an suspek nga hi Nelson Ocasla, 24 anyos an pangidaron, miyembro han CAFGU Active Auxiliary (CAA) ha Brgy. Botoc Pinabacdao Samar ngan residente liwat hiton Can-avid, Eastern Samar.
Subay ha inisyal nga imbestigasyon tipauli na an biktima kaupod an mga kasangkayan hini tikang ha sarayaw han tigda na la nga nanutok hin pusil an suspek ha mga sibilyan nga nakadto ha mao nga lugar.
Ginsaway naman ini han natura sundalo ngan didto na nagtikang an komosyon.
Gin-aalegar nga nakainom an suspek han nag-agaway hira hin pusil hiton biktima ngan aksidente niya nga nakablit an trigger.
Naigo naman ha likod han ulo iton biktima ngan dayon ini nga gindara ha ospital.
Ha usa nga hot pursuit operation nadakop an suspek nga bumalik pa ha kampo mahuman an insidente.
Nakuha ha posisyon hini an usa nga unit hin 45 caliber pistol nga waray kaangayan nga dokumento.
Ha pagkayana aada na ha kustodiya han Calbiga Municipal Police Station an suspek ngan naatubang ha kaso nga attempted murder with the use of unlicensed firearms.
