Usa nga waste collection company ha Bitonto, Italy an bumulig agud mabawi an usa nga winning lottery ticket nga nagkakantidad hin 1,000,000 Euros (o sobra-kulang 70 million pesos) mahuman ini aksidente nga mailabog han tag-iya ha basurahan.
Sumala kan Roberto Nicola Toscano, direktor han waste collection company nga Sanb, pumalit an waray na ngarani nga residente han Bintonto hin MillionDay ticket para ha draw dida han Hulyo 31 gamit an nakahiaraan hini nga mga numero nga 2, 4, 8, 10, ngan 51.
Mahuman an draw, iginpa-scan han player an ticket ha usa nga tindahan agud kitaon kun nagdaog ini. Gumawad daw an mensahi nga “non-payable,” sanglit ginhuna hini nga waray premyo an ticket ngan iginlabog ha basurahan han tindahan.
Ha pag-iha in nahibaruan niya nga gumawas ngay-an ha draw an ngatan han iya numero. An mensahe nga “non-payable” in dire nangangaruyag sidngon nga perdi an ticket hini, kundi duro hin kadako an premyo para ma-claim ha nasabi nga tindahan.
Dayun nga bumalik ha tindahan an pamilya han nagdaog agud pamilngon an ticket, pero nakolketa na an basura.
Mahitungod hini, nakigsumpayan hira ha Sanb, nga nagtikang gihapon tudlukon kun hain nga garbage truck an kumuha han basura tikang ha tindahan.
Han mabiling an sarakyan, waray gihapon dayun ighuwas an sulod hini ha pasilidad han kompanya mahitungod ha posibilidad han kontaminasyon han basura. Nakigsumpayan pa an Sanb ha usa pa nga kompanya ha Bari area kun diin pwede usa-usahon ngan saraon an mga basura.
Mahuman an mahugot nga pamiling, nakita gihapon han mga empleyado an winning ticket. Nakadto ini ha usa nga gisi nga bag kaupod an damo pa nga lottery ticket, ngan an pira in naruba na. Ha kaupayan, bug-os ngan ayad pa an ticket nga nagkakantidad hin 1 million euros.
