Gintanggal han Maharlika Pilipinas Basketball League (MPBL) an Bacolod Masskara ha nasasalin nga parte han season mahuman an gin aalegar game manipulation kontra ha Bulacan Kuyas.
Ha nasabi nga mulay, nag-angkon hin 100-64 nga kaperdihan an Bacolos ngan waray na makapuntos ha urhi nga 7 minutos ngan 48 segundos han 4th quarter han mulay, samtang nakaghimo pa hin unom nga turnovers.
Sumala kan MPBL Commissioner Emmer Oreta, mahugot nga dedepensahan han liga an integridad han Philippine basketball ngan dayon hira magios kontra ha anuman nga pitad nga magruruba ha pagtapod han mga tagasuporta, koponan, ngan publiko.
Dugang pa han MPBL, dati na nga natagan hin pahimatngon an Bacolod Masskara kasumpay han mga nauna nga insidente nga nahipatik ha buhatan han komisyuner.
Gin aprubahan naman ni MPBL Founder ngan CEO Manny Pacquiao an iginpahamtang nga sirota mahuman niya mapanood an nasabi nga mulay. Samtang, nagdumara na gihapon hin fact-finding investigation an Games and Amusements Board (GAB).
Aauran hin eksplinasyon an mga players ngan iba pa nga dabi agud masigurado an due process ugsa magpagawas hin pinal nga desisyon subay ha ginpapatuman nga mga patakaran.
