ODD NEWS– Seryoso an startup company nga GRU Space ha ira plano nga abrehan an gi-syasyahani nga hotel ha bulan o an gintatawag nga Moon Hotel ha 2032, ngan nagikang na hira nga kumarawat hiton mga reservation!
Ha pangunguna hiton 21-anyos nga hi Skylar Chan, gin-aghat hiton kompanya an mga space enthusiasts nga may kapas maghulog hin downpayment nga nagkakantidad hin $250,000 – $1 million (kabalyo hiton P58 million).
Ha kaluyo nga dire pa sigurado an final price han accommodation, ginbabana-bana nga maabot ine ha $10 million kada- kuwarto.
Kakaib an estratehiya han GRU Space kumapara ha iba nga kompaniya matungod nga imbes maghakot hin magbug-at nga materyales tikang ha kalibutan, magamit an mga ine hin robotic systems agud nga maghimo hin madig-on nga bloke gamit mismo an regolith o moon soil.
Ginlalauman nga magtitikang an konstraksyon ha 2029 kun maaprubaran ine.
Sumala kan Chan, usa nga anay Air Force pilot trainee ngan YCombinator alumnus, panuyo nira nga himuon nga interplanetary an mga katawhan ngan tagan hin higayon an mga ine nga maka-eksperyensya hin kinabuhi ha gawas hiton kalibutan ugsa an mga ine mamatay.
