ODD NEWS – Usa nga kilala nga modela ha India an nakakarawat hin pambabatikos mahuman ine nga magkunwari nga namatay agud igduso an iya adbokasiya kontra ha cervial cancer.
Nahikasalan an mga fans han model nga hi Poonam Pandey han magkamay-ada hin anunsyo ha Instagram account hine nga namatay ine dida han Pebrero 3, 2024. Subay han anunsyo, namatay ha cervical cancer hi Pandey.
Hi Pandey in usa nga 32-anyos nga model, reality star, ngan Bollywood actress. Nakilala ine ha mga reality show nga “Fear Factor India” ngan “Lock Upp”.
Damo naman an nagpaabot hin pakikisubo tikang ha mga fans ngan kasangkayan hine ha comment section ha nasabi nga Instagram post.
Usa kaadlaw mahuman nga mabalita an pagkamatay hine in nagpost hin video hi Pandey kun diin ginpakita nga buhi pa ine ngan usa la nga publicity stunt an iya ginbuhat.
Sumala pa hine, karuyag la niya nga igduso an cervical cancer awareness ha India ngan ha iya pagkita in pinakamaupay ine nga pamaagi agud pag istoryahan an nasabi nga sakit.
