TACLOBAN CITY: Gin-aaghat an publiko nga maki-usa ha pagdudumaraon nga Miss Leyte Liberation Coronation Night 2024 ha Leyte Convention Center/Leyte Academic Center, ha maabot nga Oct. 18, Biyernes nga adlaw alas 7 hiton gab-i.
Sumala kan Eugene Tan, President Pintados Foundation, maabot naman 14 nga mga kandidata tikang ha magkalain-lain nga lugar ha Leyte an mapartisipar ha nasabi nga paisan-isan.
An Leyte Liberation in gindudumara kinada 5 katuig, kasumpay na gihapon han pagdudumaraon nga komemorasyon han 80th Leyte Gulf Landings.
Manunumduman, gindumara an urhi nga Miss Leyte Liberation han pagdumdom han ika-75th nga komemorasyon han Leyte Gulf Landings.
Ginmalatumat naman hine, nga magkakamayda hin maupay nga mga konsepto ngan kiritaon an ira gin-andam para ha nasabi nga pisan-isan.
Para hadton interesado kinahanglan han mga ine nga pumalit hin ticket nga nagikakantidad hin P250, mapapalit naman ine ha Tap Commercial, Luxury Suites Hotel, Spinner Ice Cream – Robinsons Marasbaras, Spinner Ice Cream – Savemore, Saint Paul School of Professional Studies Miss Leyte Liberation Candidates.
Samtang, an magigin host, naman han nasabi nga paisan-isan in hira Angelee Delos Reyes ngan an charismatic actor ngan model, Juan Carlos Galano.
Ginlalauman gihapon ni Tan, nga damo an makiki-usa nga mga dagko nga mga personalidad, matungod nga kinada 5 katuig la ine natatabo.
