TACLOBAN CITY – Magkakaada hin mga magkadurudilain nga mga celebrity guests an Miss and Miss Teen Pintados 2023, ini an gin anunsyo han Pintados Foundation para han pagselebrar han kapatrunan han syudad han Tacloban mahuman an pira katuig nga temporaryo la anay ini nawara tungod han COVID-19.
Sumala kan Eugene Tan, Presidente hitun Pintados Foundation nga magigin espesyal an mao nga pageant yana nga tuig mahitungod nga magkakaada hira hin launching han Miss World Philippines- Eastern Visayas ngan sugad man gihapon an back to back concert ni Zild.
Magpapaisan-isan an 15 nga mga kandidata para han Miss Pintados ngan 15 gihapon an para naman han Miss Teen Pintados.
Dugang pa ni Tan, nga ira gin linya ha criteria han Miss World Philippines an pageant yana nga tuig sanglit magkakaada hira hin National Costume Competition agud nga andam an kandidata nga igpapadara ha kompetisyon naman ha Miss World Philippines.
Iginpasabot gihapon hini nga mayda hira pagbubuhaton nga preliminary competition sano paman an Coronation Night.
An preliminary competition sugad han National Costume Competition ngan an Question and Answer portion in pagbubuhaton ha June 16 naman ha Leyte Normal University samtang an Coronation Night naman in nakatalaan manabo ha June 23, alas 6 hitun gabi ha Leyte Academic Center.
Lakip ha mga magigin bisita ha mao nga pageant night in hi Miss World Philippines Franchise Holder Arnold Vegafria, Miss World Philippines 2022 Gwendolyn Fourniol, Mr. World Philippines 2022 Kirk Bondad, aktor nga hi Vin Abrenica ngan magigin hosts naman hira Miss Universe Philippines 2013 Ariella Arida ngan aktor nga hi EA Guzman.
