CATBALOGAN CITY – Patay an usa nga misis ha syudad han Catbalogan mahuman nga pagbun-on han iya kalugaringon nga mister dida han nakalabay nga adlaw.
Ginkilala an misis nga biktima kan alyas Lea, 53-anyos, samtang an suspek naman nga mister in hi alyas Ador, 56, parehas residente han Brgy. Iguib. Catbalogan City.
Sumala kan Catbalogan City Police Office Chief of Police PLtCol. Norman Ala, selos an kawsa han panmuno han suspek ha biktima.
Basar han imbestigasyon, haros usa kabulan na nga ‘shaky’ an relasyon han suspek ngan biktima ngan masukot na an pagbinulag-bulag han mga ine ngan magbalik naman kahuman.
Dida han mahitabo an insidente in magbulag na utro an suspek ngan biktima pero karuyag daw han lalaki nga makigbalik ha biktima sanglit kumadto ine ha balay han biktima.
Ha ira paghampang in waray tumugot an biktima nga magbalik hira kun diin dumalagan pa ine pa-gawas han ira balay pero gin lanat ine han suspek ngan gin panmuno.
Nag-angkon naman an biktima hin damo nga binun-an ha iya taludtod.
Mahuman an insidente in nakakalagiw pa an suspek pero nadakpan gihapon ine ha may Tarangnan area.
Ginpasakahan naman hin kaso nga murder an suspek.
