TACLOBAN CITY – Nakaghipatik an gindumara nga Mini-Agraryo Trade Fair han Department of Agrarian Reform (DAR) hin P241,110 nga kabug-usan nga benta ha upat kaadlaw nga pag-abri han mga ine.
Sumala kan Jose Alsmith Soria, Regional Information Officer hiton Department of Agrarian Reform VIII, pormal nga gin abrihan an nasabi nga trade fair dida han nakalabay nga semana kun diin ginpakita hine an magkaduru-dilain nga produkto han mga agrarian reform beneficiaries organizations (ARBOs) tikang ha magkaduru-dilain nga parte han rehiyon.
Nagin abilable an magkaduru-dilain nga produkto sugad han mga prutas, utanon, bunay, processed foods ngan mga handicrafts.
Samtang, nakuha naman han booth han Province of Leyte an pinakahitaas nga sales nga umabot ha P73,648, ngan ginsundan naman han Province of Western Samar nga nakakuha hin sales nga P43,322.
Sumunod naman an Northern Samar nga nakakuha gihapon hin sales nga ₱36,210, an Eastern Samar nga mayda ₱33,075, Southern Leyte naman ha ₱30,970, ngan Biliran nga nakakuha gihapon hin ₱23,885.
