TACLOBAN CITY – Maabot ha 262 nga mga anay miyembro han rebelde nga grupo nga yana in nagbalik-loob na ha gobyerno an nakakarawat hin financial assistance nga personal mismo nga iginpaabot ni Presidente Rodrigo Dutere ha iya naging pagbisita ha San Isidro, Leyte.
Nakakarawat hin P15,000 nga immediate assistance tikang ha E-CLIP an mao nga mga anay rebelde ngan P10,000 naman tikang ha probinsya han Leyte.
33 nga mga former rebels naman an nakakarawat hin P50,000 livelihood assistance.
Labot pa hini in maabot gihapon ha sobra P6 million an ginhatag han presidente ha magkadirudilain nga farmer’s association nga ginkakalakipan han mao nga mga anay rebelde.
Samtang, nakakarawat naman hin tag-tres milyones kapesos an 20 nga mga bungto ha Leyte nga nadarahigan han bagyong Ursula.
Kalakip hini an mga munisipalidad han:
Alangalang
Jaro
Barugo
Babatngon
Calubian
Capoocan
Kananga
Matag-ob
Pastrana
Palo
San Isidro
San Miguel
Sta. Fe
Tabango
Tanauan
Tolosa
Leyte-Leyte
Tunga
Villaba
Palompon
P5 million naman an nakarawat han city government han Tacloban ngan P10 million han probinsya han Leyte.
Ha naging mensahe han presidente, gintagan hin duon hini an iya pagiging Leyteño sanglit milyones nga kantidad hin ayuda an iya ginhatag.
