PARANAS, SAMAR – Nagklaro an militar kasumpay han nahitabo nga engkwentro ha Brgy. Sto. Niño, Paranas, Samar dida han nakalabay nga Pebrero 5 han presente nga tuig, kun diin duha nga daw parag-uma an nahidabi hine.
Sumala kan Philippine Army 8th Infantry Division, Division Public Affairs Officer, Capt. Jefferson Mariano, usa nga lehitimo nga operasyon an ira gindumara ha nasabi nga lugar.
Dugang pa hine, napamatud-an nira nga membro an mga ine han Yakal platoon, han Sub-regional Committee Browser han New People’s Army Eastern Visayas Regional Party Committee.
Basar ha impormasyon, syahan nga naka-engkwentro han 87th Infantry Battalion an mga walhun nga grupo dida han alas-5 han aga han Pebrero 5, ngan nasundan liwat dida han mga alas-8 han aga han kaparehas nga adlaw, han kaparehas la gihapon nga grupo nga nagpu-prubar pag iskapo.
Kun diin, ika-duha na nga engkwentro in napatay han mga tropa han gobyerno an duha nga membro han walhun nga grupo.
Nadiskubrehan gihapon han mga militar an usa mga M16 rifle, usa nga .45 calibre pistol, duha nga anti-personnel mines nga banned han international law, rifle grenade, magkaduru-dilain nga klase hin bala, ngan iba pa nga paraphernalias.
Sugadman, nagpa-abot naman hin pakiki-subo an militar ha pamilya han mga napatay nga rebelde.
Ha kaluyo hine in nagpahimatngon gihapon an tropa han gobyerno nga dire magpa-‘dara’ o magpa-uwat ha mga walhun nga grupo, lugod kun mayda daw mga sugad nga impormasyon in igpahibaro ha ira agud matagan ine hin aksyon.
Samtang, gin aghat naman ine an mga nabibilin nga mga membro han walhun nga grupo nga mag-surender nala mahitungod nga dire maundang an ira tropa ha pamiling ha mga ine hasta nga maubos na an mga rebelde ha Sinirangan Bisayas.
