Gin aadman han kampo ni anay Anakalusugan party-list Rep. Mike Defensor an posible nga pagpapasaka hin reklamo nga administratibo o kriminal kontra kan National Bureau of Investigation (NBI) Director Melvin Matibag kasumpay han daw pauru-utro nga pagpapatawag ha iya ha gindudumara nga imbestigasyon han gintawag nga “maleta boys.”
Ha usa nga pahayag, ginmalatumat ni Atty. Ferdinand Topacio, abogado ni Defensor, nga posible dad-on an reklamo ha Department of Justice (DOJ) o Office of the Ombudsman kun magpapadayon an gintatawag nga nira “pattern of harassment” kontra ha iya kliyente.
Sumala kan Topacio, kun natuod an NBI nga mayda nahimo nga pagtalapas ha balaod hi Defensor, kinahanglan ini ig agi ha sakto nga proseso pinaagi han pagpapasaka hin pormal nga kaso ha piskalya imbes nga pauru-utro nga pagpapadara hin subpoena.
Iginduon han abogado nga mayda nagpapadayon nga mga balaod nga natutudlok han pagbaton ha mga opisyal han gobyerno nga pwede naabusar ha gahom. Gintagan-duon gihapon niya nga posible daw magin complainante an NBI imbes nga magpadayon ha pagpapatawag han mga testigos kun mayda nakikita nga ebidensya.
Nag-ugat an isyu mahuman utro nga igpatawag han NBI hi Defensor kasumpay han imbestigasyon ha gintatawag nga “maleta boys” ha maanomalita nga flood control projects.
