Gin amin ni anay Anakalusugan Rep. Mike Defensor nga bumulig hiya ha 18 nga anay marines ngan navy nga daw nagserbi nga bagmen o tagadul-ong han salapi para kan anay Ako Bicol Party-List Rep. Zaldy Co.
Sumala kan Defensor, nagdesisyon hiya nga bumulig mahuman nga mahibaruan niya an plano nga pagbuyagyag han iba pa nga anay sundalo kasunod han testimonya ni Orly Guteza ha pagdungog han Senate Blue Ribbon Committee.
Kaupod ha iya nagin bulig an paghahatag hin sarakyan ngan suporta ha gindumara nga press conference dida han Pebrero 24.
Iginduon ni Defensor nga panuyo la niya nga maigawas an kamatuuran kasumpay ha mga alegasyon han korapsyon ngan masigurado an katalwasan han mga anay sundalo ngan han ira pamilya.
Dugang pa hini, waray an mga ini maraot nga motibo ngan andam nga dig-unan an ira mga pahayag.
Gin klaro naman han anay magbabalaod nga waray hiya hibabruan ha pagbug-os han mga affidavit han mga nag-akusa.
Gin pahayag gihapon hini nga posible umabot ha 90 katawo kaupod an mga aktibo ngan retirado nga sundalo ngan pira nga anay opisyal an posible nga magpakita ngan magpahayag kasumpay han isyu.
Samtang, gin sukna naman hini an mga nagpapahayag nga kaparte ini han destabilization plot kontra ha administrasuon.
Syahan na nga nagpahayag an Makanyang nga posible mayda mga grupo nga karuyag patalsikon ha pwesto ni Presidente Ferdinand Marcos Jr. kasumpay han mga alegasyon.
