Kakasuhan han National Bureau of Investigation (NBI) han human trafficking hi anay Anakalusugan Rep. Mike Defensor kasumpay ha gin-raid nga KTV bar ngan Hotel ha Pasig CIty dida han nakalabay nga semana.
Sumala kan NBI Director Melvin Matibag, igin lakip hi Defensor kumo respondent ha mga kaso nga igsasalawad ha masunod nga semana ha Inter-Agency Council Against Trafficking ha Department of Justice (DOJ).
Nagawas ha imbestigasyon nga mayda direkta nga koneksyon an anay kongresista ha establisyemento nga ginraid di pala maiha, kun diin nasalbar an 54 nga kababayen-an nga biktima han sexual exploitation.
Ginmalatumay han NBI nga an nasbai nga property in 99% nga panag-iya han gobyerno nga ada ha ilarom han Presidential Commission on Good Government (PCGG), pero ginre-rentahan hin usa nga kumpanya nga ginpapahayag mayda koneksyon kan Defensor.
Subay pa ha ahensya, sobra-kulang 75% han kumpanya in paanag-iya han anay magbabalaod, ngan mayda koneksyon gihapon ha iba pa nga kompanya nga naka-link ha iya pamilya.
Syahan na nga ginpasakahan hin reklamo an asawa niya nga hi Julie ngan anak nga hi Miguel Defensor ha Pasig City Prosecutors Office kasumpay ha sex exploitation ha nasabi nga establisyemento.
