TACLOBAN CITY – Naki-usa an mga Waraynon ha paghinumdon ngan paghatag hin pag-ampo kan Pope Francis nga hadto in bumisita ha Leyte dida han 2015 kasunod han trahedya han Super Typhoon Yolanda.
Naghalad hin kandila, bukad, ladawan an mga Waraynon ha pagbisita han Santo Papa ha Tacloban dida han Enero 17, 2015.
Nagbuhat naman hin simple nga seremonya kumo paghalad ha Santo Papa ha pagtalikod hini ha kadayunan kun diin, nagkamayda hin misa ngan iba pa nga aktibidades ha Metropolitan Cathedral of Our Lord’s Transfiguration ha Palo, Leyte nga ginbisita hadto ni Pope Francis agud tagan hin pangadi an mga pumahuway ha kinabuhi dida han Bagyong Yolanda.
Nagkamayda gihapon hin misa ha New Tacloban Daniel Z. Romualdez (DZR) Airport Tarmac ha Tacloban City kun diin, dinhi naman ginbuhat an misa ha pagbisita han Santo Papa dida han tuig 2015 agud matagan hin kamurayawan an mga biktima han bagyo ngan paglaum ha mga naapektaran han nasabi nga trahedya.
Samtang, sumala naman kan Archdiocese of Palo Vicar Gen. Rev. Msgr. Gilbert Urbina, nga an paghalad hin pag-ampo ngan paghinumdom in amo an paagi han mga Waraynon ha pagpasalamat ha kaluoy ngan kadasig nga iginhatag ni Pope Francis, nga tubtub yana, in nagpapabilin ha aton mga kasingkasing.
