TACLOBAN CITY–Umabot na ha 836 an ihap han mga manurutdo nga nag-boluntaryo nga magin tutor para han Academic Recovery and Accessible Learning (ARAL) Program han Department of Education (DepEd) Tacloban City.
Kalakip ha mga nag-boluntaryo an 232 ka tutors para han K stage 1 (grade 1-3), 245 ha K Stage 2 (grade 4-6), ngan 259 para Junior High (grade 7-10).
Ginmalatumat ni DepEd Tacloban Information Officer, Nilo Eder nga dire hira tatagaon hin damo nga loads, subay hiton Civil Service Commission kun diin dire hira nasobra hin 6 teaching hours.
Dugang pa hine, kun sumobra an nasabi nga loads, kinahanglan maghatag an DepEd hin dugang nga renumeration ha mga ini.
Mababaruan nga tumong han programa an pagatiman ha mga learning gaps ngan pagpakusog ha mga foundational skills ha pagbasa, matematika, ngan agham para ha mga estudyante ha kindergarten kutob Grade 10 kun diin ginpili an mga estudyante pamaagi hin mga reading assestments kalakip an mga mayada habubo nga proficiency ha pagbasa o dire nakakabasa.
