TACLOBAN CITY – Nakikisubo an mga simbahan ha rehiyon ha pagkamatay ni Pope Francis o Jorge Mario Bergoglio ha tinuod nga ngaran.
Sumala kan Archdiocese of Palo Vicar General, Rev. Msgr. Gilbert Urbina, nagin kaparte manggud han eksperyensya ha kinabuhi han mga taga-Leyte an nagin pagbisita ni Pope Francis ha rehiyon partikular na ha syudad han Tacloban ngan Palo dida han nakalabay nga Enero 17, 2015.
Dugang pa hine, nakiusa mismo an Santo Papa ha mga katawhan kun diin nagdumara pa ine hin misa ha Palo Metropolitan Cathedral of Our Lord’s Transfiguration nga gin atenderan naman han yinukot-yukot nga mga katawhan tikang ha magkaduru-dilain nga parte han rehiyon.
Ginbalikan gihapon ni Msgr. Urbina an panhitabo kun diin personal hine nga nakahampang ngan nakaupod an Santo Papa ha pagmisa hine.
Labot pa hine in nakasaro gihapon han Santo Papa ha pagkaon han paningudto an pira nga mga pamilya nga nagin biktima han Super Typhoon Yolanda nga naglasurbo dida han nakalabay nga tuig-2013.
Samtang, ha ngaran han bug-os nga Archdiocese of Palo in nagpasalamat naman ine ha Santo Papa ha paghahatag hine hin paglaum ha mga katawhan ngan pagpapadig-on han pagtapod ha Diyos.
