TACLOBAN CITY – Malipayon an mga retailers hiton bugas ha nagin pagtanggal hiton price cap ha bugas mahitungod nga magkakamay-ada na daw hin damo nga pagpipilian hin bugas nga kukumprahon an mga rice retailers.
Sumala kan Frederick Dy, Presidente hiton Grains Retailers Confideration (GReCon) han Eastern Visayas, dire na daw hira mahadlok nga makatalapas han balaod nga EO No. 39 ngan mayaknan nga nagbabaligya hira ha overprice nga presyo.
Dako daw gihapon ine nga bulig ha mga kunsumidor mahitungod nga damo na nga klase hin bugas an ira pagpipilian.
Samtang, dire pa naman daw sugad ka stable an suplay han bugas ha pagkayana mahitungod nga bisan paman kun mayda na harvest in mayda la gihapon pag-umento hiton presyo hine mahitungod han kadako han demand hiton bugas yana kun diin aanhi gihapon ha rehiyon namamalit an iba nga mga parag-bugas tikang ha iba nga rehiyon.
Parehas la naman iton pamresyuhan han pamalit han bugas han tikang ha iba nga rehiyon nga nakumpra ha dinhi ha aton; tikang han pag-implementar han price ceiling dida han nakalabay nga bulan, an presyo han pamaligya han sako han bugas in P2,100 pero ha pagkayana in sumaka na ine ha P2,200 kada sako.
