HEALTH NEWS – Mga kabombo, maaram kaba nga gindidire an pagkakaturog kun ikaw in busog pa? Ini in mahitungod nga delikado ini para ha imo panlawas.
Ginsasagdon nga dire ka kumaon hin lapos ha ala siete hiton gab-i agud nga magkaada hin panahon an tiyan ha patunaw han imo mga ginkaon.
Makukurian an aton tiyan, atay, pancreas, ngan kasing kasing tungod ha pagkaturog samtang ikaw in busog. Mas sanay nga gumana an mga organs ha lawas kun kita in nagmamata. Kun nakaturog na in baga baga hin ginhuhubya gihapon nga magtrabaho an aton mga organs. May gintatawag nga circadian rhythm an lawas ha pagtunaw han aton mga ginkaon.
Adi an posible nga mahitabo kun makaturog ka hin busog
1. Madudugngan an imo timbang ngan mahilapad an imo waist o hawak.
2. Mag-uul-ol an imo tiyan tungod ha gastric reflux. Kun humigda ka hin busog posible nga sumaka an imo ginkaon ha esophagus .Maiirita ini ngan maghahapdos an imo tiyan.
3. Makakaabat ka hin palpitasyon. Kun busog o mahangin an tiyan, pwede nga maapektaran an vagus nerve ngan magdurot hin palpitation.
4. Posible nga magdurot ini hin stroke sumala ha usa nga pag-aram
5. Posible nga humubag an pancreas. An acute pancreatitis in durot han sobra nga pag-ininom hin makahurubog nga irimnon ngan pagkakaada hin gallstones. May mga nagyayakan nga an pagkaon hin sobra nga mamantika ngan matam-is in makakadaot gihapon ha aton pancreas.
Adi naman an imo sadang nga buhaton:
1. Ayaw pagpakabusog labi na hiton gab-i. Kumaon hin 5 ngada unom kabeses ha kada adlaw pero kinahanglan nga talagudti la. An usa nga saging, mansanas, pandeasl in pwede na nga panmeryenda. Ha sugad nga paagi hinay hinay an pagsakob han nutrisyon ha lawas. Mas magigin kalmado an mga organs ha aton lawas.
2. Maghulat anay hin tulo kaoras pagkahuman kaon ha gab-i san-o kumaturog. Pwede nga tumukdaw o maglakat lakat in 10-15 minutos agud nga mabuligan an pagtunaw han pagkaon ha tiyan. May bulig an gravity para umubos an aton ginkaon. Ayaw paglingkod o paglingkod dayon kahuman pagkaon.
