TACLOBAN CITY – Nahimo nga timprano an pag-uli ha Pilipinas han pira nga mga Pinoy nga nagbakasyon ha Macau, China tungod han posibilidad nga magpatuman hin lockdown ha lugar durot han hulga han corona virus.
Sumala kan Bombo International Correspondent Grecil Eval, nga nagbakasyon ha Macau kaupod an iya baby ngan sister in law, imbes nga mag-enjoy ha ira bakasyon in nagparebook nala hira hin ticket agud nga makauli ha Pilipinas tungod han ginkakahadlokan nga corona virus.
Dugang pa ni Eval, ha pagkayana in pito na an kumpirmado nga kaso hin corona virus ha Macau ngan dire na gihapon ginpapasulod ha mao nga lugar an mga tawo o Chinese nga tikang ha Wuhan, China.
Nagpapanic buying na gihapon daw an mga katawhan ha Macau kun diin nagkakaubusay na hin baligya nga bugas ngan mga groceries tungod nga damo na an namagsirado nga mga tindahan.
Mismo ngada han Chinese New Year in sirado an mga establishmento ha ira lugar.
Suspendido gihapon an klase ha tanan han ira mga eskwelahan tubtob hiton Pebrero 17 pero posible pa daw ini nga maextend kun magtikahitaas pa an kaso han corona virus ha mao nga lugar.
