TACLOBAN CITY – Nananawagan ha pagkayana an pira nga mga Overseas Filipino Workers (OFWs) ha Lebanon nga buligan hira nga makauli ha Pilipinas tungod ha ira ginkakahadlukan nga posible pa magkaada hin pagbuto mahuman an nahitabo nga twin blast ha Beirut port ha mao nga nasud.
Sumala kan Ursula Buenavista Guira, OFW ha Beirut, Lebanon, humiling hiya ha ira bintana han mahitabo an makusog nga pagbuto rason kun kay-ano nag-angkon hini hin damo nga samad ha iya lawas.
Dugang pa hini nga pumakadto hiya ha ospital para ipatambal an iya naangkon nga injury pero nagdesisyon la ngahaw nga umuli nala tungod nga mismo an mga ospital in nagkaguguba ngan puno gihapon hin mga biktima nga namatay ngan nasamaran tungod ha makusog nga pagbuto.
Ha pagkayana in nababaraka ngan dire la gihapon nahimumutang an pira ha ira sanglit ira panawagan ha gobyerno han Pilipinas nga buligan hira nga makauli.
Mismo hi Guira in nakatalaan na unta nga umuli ha Pilipinas yana nga bulan pero naabtan liwat ini han utro nga paglockdown ha ira lugar tungod ha COVID-19 pandemic.
