NATIONAL NEWS– Nanindugan an Department of the Interior and Local Government (DILG) nga dire nira kikilal-on an paglingkod ngan panunumpa ha pwesto han mga matutudlok nga opisyal nga pakyas magsumiter hin Statement of Contributions and Expenditures (SOCE) o statement of campaign expenses.
Ginmalatumat hiton DILG, nga ha ilarom han balaod, nagmamando ine nga waray opisyal nga angay mag-assume ha pwesto hangtod nga maisumiter hine an ginkikinahanglan nga SOCE alinsunod ha patakaran nga gintudlok han statement of campaign expenses.
Kasumpay hine, ginmanduhan han ahesnya an tanan nga regional ngan field offices nga makipagsumpayan ha Comelec para ha verification ugsa nga mag-assume ha pwesto ha local levels.
Nagpahimatngon an ahensya nga pwede magresulta hin administrative fines an pakyas nga magsumiter hin SOCE.
Gintagan duon han DILG, nga nagpapakita la ine hin transparensiya ngan pagtuman ha pagsumiter hiton SOCE han paggamit hin campaign funds para mapabilin an integridad ngan pagtapod han publiko ha proseso han piniliay.
