TACLOBAN CITY – Unom nga mga menor de-edad an samaran, mahuman nga aksidente ine nga mabuthan han gindagkutan nga alcohol ha Capoocan Central School.
Ine in ginbubug-os hin 4 nga lalaki ngan 2 nga kababayen-an nga nag-angkon hin second degree burn.
Sumala kan PMAJ. Herbert Prias, Chief of Police han Capoocan MPS, ine nga insidente in ginkakadabihan hin mga estudyante han Grade 6.
Subay han gindumara nga imbestigasyon, ine nga mga kabataan in nakadto ha sulod han classroom kaupod an mga biktima ngan mga classmates hine ngan namamagminurumlay.
Dugang pa han mao nga opisyal nga subay ha ira inisyal nga imbestigasyon, may-ada usa nga bata nga kumita hin usa nga empty bottle han alcohol nga nakada han bawbaw han lamesa han ira maestra.
Kinuha naman ine niya ngan kumita pa hin usa ka gallon nga alcohol nga gingagamit pag dis-infect kun diin iya gin refill ine ngadto han iya napurutan nga empty bottle hin alcohol.
Mintras daw ginrerefill ine han usa nga estudyante, in kumuha naman hin lighter an iya classmate ngan gin dagkutan ine ngan didto na nagkamay-ada hin pag-explode han alcohol nga kun diin ha pagbuto hine an mga biktima in nagkamay-ada mga burning injuries haira parte han lawas.
Dayun naman nga gindara han MDRRMO Capoocan ha Cargiara District Hospital an mga kabataan, ngan ha pagkayana in nagappailarom pa hin medical treatment.
Mahibabaruan nga waray daw maestra nga nag-atiman han mga kabataan durante han panhitabo.
