TACLOBAN CITY – Ginpahayag naman han pira nga mga analyst ha Sinirangan Bisayas nga ha kaluyo han pagkakaiba-iba han mga panlantaw han mga katawhan bahin han EDSA Revolution han tuig 1986, sadang la gihapon ini nga dumdumon tungod nga parte ini han kasaysayan han Pilipinas.
Una hini, yana nga adlaw gindudumdom an ika-36 anyos nga anibersaryo han EDSA People Power Revolution.
Sumala kan Dr. Clemelle Montallana, usa nga analyst ngan propesor ha Tacloban, mismo ha ira mga miyembro han pamilya in mayda iba-iba nga opinyon ngan pagtuo bahin han EDSA Revolution sugadman han martial law.
Ha kaluyo hini, in nagtutuo naman an mao nga propesor nga sadang la gihapon nga dumdumon an mao nga parte han kasaysayan han nasud.
Ini in naging simbolo han pagkakaurusa han mga Pilipino hadto nga panahon para makab-ot an ira uusa nga panuyuan o hingyap.
Importante gihapon daw nga mahibaro an ngatanan labi na an mga kabataan bahin han kasaysayan han Pilipinas agud nga dire na mautro an mga sayop han naglabay.
