Temporaryo nga gindidire han mga otoridad ha parte han probinsya han Ituri ha Republic of Congo an pagdumara hin “funeral wakes” o lamay ngan mga katitirok mahitungod ha nagtitika-grabi nga Ebola outbreak ha rehiyon.
Basar ha gindumara nga press conference han World Health Organizatiuon, maitutudlok nga “very high” an kadelekaduhan han pagsarang han Ebola ha Congo, samtang nagpapabilin naman nga hamubo an posibilidad nga magsarang an nasabi nga sakit ha bug-os nga kalibutan.
Sumala kan WHO Director-General Tedros Adhanom Ghebreyesus, maabot na ha sobra 80 an kaso han Ebola ngan sobra pito an nakumpirma nira nga namatay ha Congo nga kun diin, natuo hiya nga mas damo pa an ihap han apektado han outbreak.
Nagpapabilin la gihapon nga waray bakuna para ha Bundibugyo strain han Ebola nga upat na ka-semana na tikang han makaapekto ini ha pira nga mga lugar ha Congo.
