Paghihingadayan na ha masulod nga semana an mga kontrobersyal nga ngaran nga iginsusumpay ha maanomaliya nga paggamit ni Vice President Sara Duterte ha iya confidential ngan intelligence funds (CIF).
Kalakip dinhi an Mary Grace Piattos, Milky Sikuya, ngan iba pa nga mga ngaran nga syahan lumutaw dida han gin iimbestigahan han House Committee on Public Accountability and Good Government an intel fund han Bise Presidente.
Sumala kan House Prosecutor Terry Ridon, ngatanan han mga ngaran nga nagserbi nga recipient o nakakarawat hin intel fund in posible nga lumutaw utro ha paghingaday ha nasabi nga pondo nga nakasulod ha Article I han Articles of Impeachment.
An pagpresente hini in mahugot nga gin aandaman han panel, kaupod na an mga ebidensya nga nasuporta ha nasabi nga alegasyon.
Plano han panel nga igbuyagyag an mga report han Philippine Stastistics Authority (PSA), nga magpapamatuod kun mayda nagpapadayon nga mga rekord para ha mga nasabi nga ngaran.
Kun babalikan, syahan na nga ginsertipikan han PSA nga an mga kontrobersyal nga ngaran in waray ha database hini, ngan waray gihapon nga birth records nga nasuporta ha posible nga kapanganakan han mga ini.
Syahan nga lumutaw an mga ngaran ha acknowledgment receipt nga ginamit kumo suporta ha liquidation han confidential funds han OVP ngan DepEd ha ilarom han pagmamangulo ni VP Sara.
