TACLOBAN CITY – Nagin malinampuson an ginbuhat nga Bagong Pilipinas Serbisyo Fair Caravan ha Sinirangan Bisayas nga ginbuhat dida han Agusto 2 ngan 3, 2024 ha syudad han Tacloban nga kun diin, ginpangunahan ini ni Leyte 1st District Representative ngan House Speaker Ferdinand Martin Romualdez kaupod naman an sobra 240 nga mga miyembro han Kamara.
Nakarawat han mga Taclobanon an P5,000.00 ngan 20 kilo nga bugas ha ilarom han Cash Assistance and Rice Distribution (CARD) program, maabot gihapon ha 2,500 nga mga benepisyaryo naman an nakakarawat hin P5,000.00 kumo puhunan ngan lima ka kilo nga bugas ha ilarom han Start-up, Incentives, Business Opportunity and Livelihood (SIBOL) Program ngan aada naman ha 3,000 nga mga estudyante an natagan hin tag P5,000.00 ngan lima ka kilo nga bugas ha ilarom han Integrated Scholarship and Incentives Program (ÍSÍP) for the Youth.
Nag alutaga an gobyerno hin maabot ha P1.2-B nga pondo ha mao nga programa nga kun diin, nakada naman ha P807-M nga kantidad an iginpanhatag ha mga benepisyaryo han mga magkadurudilain nga mga cash assistance.
Ini na an ginkokonsidera nga pinakadako, pinakahaluag, ngan pinaka engrande nga Serbisyo Fair mahitungod nga nagin region-wide ini kumo pagselebrar gihapon han anibersaryo hini.
