TACLOBAN CITY — Mahugot an gindudumara nga imbestigasyon han mga kapulisan bahin ha suspek ha pagpatay han mag-uyab nga hira Jade Andre Bestudio ngan Roan Jeallen Lamparas ha Calbayog City, Samar.
Una na nga ginsalawad an kaso nga “Robbery with Homicide aggravated by Rape” kontra ha mga suspek ha opisina han Calbayog City Prosecutor dida han nakalabay nga Hunyo 20.
Sumala kan PLt.Col. Erikson Del Rosario, Chief of Police han Calbayog City Police Station, mayda hira nakuha nga extrajudicial confession ha usa nga minor kun diin mayda ini gintutudlok nga iya kaupod nga nagpusil kan Bestudio sugadman ha nanlugos ha iya uyab nga hi Lamparas.
Limitado la naman an ginpapagawas nga statement ha usa ha mga suspek nga menor de-edad bahin ha iya pag-amin nga gin-deny pa hini an iya partisipasyon ha panlulugos kan Lamparas.
Pananglitan ngadaw nga magkamayda hin klaro nga basehan basar ha mga nakuha nga seminal fluid ha gindumara nga eksaminasyon kan Lamparas kun diin nakakuha hin presensiya hin spermatozoa ha maselan nga parte han iya lawas in posible nga magsalawad pa hin kaso nga “Rape with Homicide” kontra ha mga suspek.
Mababaruan nga magkaupod an tulo nga mga suspek han pagdumaraon an panmatay han mag-uyab nga hira Jade Andre Bestudio ngan hi Roan Jeallen Lamparas ha magkaiba nga lugar ha Calbayog, Samar.
Ha pagkayana, hilarom nga imbestigasyon an gindudumara han mga kapapulisan para ha ikareresolba han mao nga insidente.
