Umabot ha sobra P6.7 bilyon an kantidad han kaduda-duda nga bank transactions ni Vice President Sara Duterte ngan mister nga hi Atty. Manases Carpio subay ha report han Anti-Money Laundering Council (AMLC) nga ginhingadayan ha impeachment hearing han House Committee on Justice kakulop nga adlaw.
Sumala kan AMLC Executive Director Ronel Buenaventura, subay ha ira system, database, o record, an mga ginsita nga bank transactions in tikang tuig-2006 kutob 2025.
Ginmalatumat ni Buenaventura nga ha nasabi nga kantidad in P3.77 billion an konektado ha bank account ni VP Duterte ngan P2.99 billion kan Carpio.
Ginpahayag ni Buenavetura nga P1.83 billion an inflow o sumulod nga salapi ha bank accounts ni Duterte, samtang P2.59 billion naman kan Carpio o kabug-usan nga P4.43 billion.
Ada naman ha P1.21 billion an outflow o na-withdraw ha account ni Duterte ngan P343.32 million ha account ni Carpio.
Labot pa hini in nasukna gihapon han AMLC an trend han paglobo han bank transactions ni Duterte dida han 2007 nga umabot ha P208.15 million.
Mas dumako pa ini dida han 2009 ngan 2013 nga mayda tinuig nga average nga P400 million.
