TACLOBAN CITY – Nagpalusad an City Government han Borongan, Eastern Samar hin executive order nga nagmamando ha ngatanan nga mga indibidwal nga tikang ha mga high risk areas han COVID-19 nga kinahanglan anay nga magpailarom ha quarantine san-o nga makasulod ha ira syudad.
Sumala kan Mayor Jose Ivan Dayan Agda, han Borongan City, epektibo ngada pa han Agosto 24 an iya igin-isyu nga Executive Order No. JIDCA-013-0820, o “An Order Amending Executive Order No. JIDCA-006-0720 Designating Isolation Facilities for Travelers to the City of Borongan from Classified Points of Origin and For Other Purposes”.
Kaparte hini in mayda mga designated isolation facilities para ha mga indibidwal nga masakob ha Borongan, depende ha point of origin han mga ini.
Subay ha mao nga executive order, tanan han mga indibidwal nga tikang ha mga lugar nga may kumpirmado nga kaso han COVID-19 ngan mayda community transmission in igkokonsidera kumo Person Under Monitoring (PUM) ngan an Borongan City isolation facilitiy an magiging designated quarantine area para han mga ini.
Tanan naman han mga travelers tikang ha gawas han rehiyon otso, tikang ha Catbalogan City, Samar ngan tikang ha mga lugar nga may confirmed local community transmission in kinahanglan nga magpailarom ha 14 day facility-based quarantine.
Samtang, an mga indibidwal nga tikang ha mga lugar nga may confirmed local transmission in kikilal-on kumo Person Advised Self Quarantine (PASQ) ngan tanan han mga tikang ha Tacloban ngan Ormoc ngan iba pa nga parte han Leyte nga karuyag pumakadto ngan magpabilin ha Borongan ha sakob hin sobra 24 oras in kinahanglan naman nga magpailarom ha mandatory 14 days quarantine ha city isolation facility.
Nagpatuman gihapon hin protocol an Borongan City ha ngatanan nga cargo truck drivers ngan personnel nga kinahanglan anay nga magpailarom ha mandatory quarantine isolation ha sakob han designated facilities han syudad tubtob hiton ira sunod nga trucking schedule.
