TACLOBAN CITY – Ha luyo nga makuri an signal han cellphone ngan maluya nga koneksyon han internet, nag aaram an mga kabataan ha Sta. Elena Elementary School ha Sta. Rita, Samar pinaagi hin online gamit an teknolohiya nga intranet.
An intranet in usa nga teknolohiya kon diin nag instalar hin usa nga server ha sakob han eskwelahan kon diin pwede mag-upload an mga magturutdo han ira mga learning materials.
An datos in mata-transmit ha mga estudyante tikang kindergarten kutob grade six pinaagi han unom nga mga antennas nga ginkabit tikang ha eskwelahan kutob ha barangay hall han Sta. Elena.
Kada maestra ngan estudyante in pwede ma-access an system gamit iton ira mga cellphones ngan computers.
Ginhimuan liwat hin account an mga estudyante para ma-access nira an mga learning materials nga ginhimo han ira mga magturutdo.
An mga estudyante la nga may accounts ngan ginrehistro han ira maestra an pwede makasulod ha network kon diin pwede nira ig answer an mga online quizzes, makit-an mga learning videos, magdownload hin e-books ngan iba pa.
Mayda liwat hini chatbox kon diin pwede makagpakiana an mga estudyante ha ira maestra kon ano an waray nira kaintindihi.
Ini nga intranet technology in ginhimo ngan ginpakilala han usa nga electrical engineer nga hi Vinyl Oquiño.
Hi Oquiño in nagtrabaho kumo professor ha Adama Science and Technology University ha Ethiopia hin unom katuig kon diin nakit an niya nga pwede makag-establisar hin intranet system ha mga tay-aw nga lugar ngan maluya an koneksyon ha internet.
Mas bentahe daw liwat ini nga teknolohiya ha pag aram han estudyante nga adto ha mga tay-aw agud nga diri hira mabayaan han moderno nga panahon.
“An advantage hini nga system syempre bata pala, maaram na gumamit hin gadget pagkadto nira ha senior high school ngan college diri na hira uwat hatechonology bisan kon tikang hira ha remote area han Samar,” pahayag ni Oquiño ha usa nga interview.
Dugang pa ni Oquiño nga tarihas han internet, an mga impormasyon nga aada ha intranet in kontrolado han mga magturutdo ngan waray kadelikaduhan nga makakita an mga estudyante hin mga maglain nga mga content.
Duha kabulan an gindalagan para matapos ini nga proyekto kon diin kaupod dinhe an pag instalar han imprastruktura ngan training ha mga maestra ha paggamit han mao nga teknolohiya.
Sumala naman kan Charlie Singh, principal han Sta. Elena Elementary School dako nga bulig an mao nga proyekto agud matagan hin de kalidad nga edukasyon an ira mga estudyante ha luyo han mga ayat ha implementasyon han distance learning tungod han COVID -19 pandemic.
Labot la nga mas nakakatipid ha oras an mga kamaestrahan, nalilipay daw gihapon an mga estudyante ha bag-o nga sistema.
” An mga estudyante pwede nira makit-an an scores mahuman an ira quiz ngan pwede nira balik balikon an mga leksyon nga waray nira kaintindihi. Automatic liwat nga narerecord an ira grades han system. Diri na masyado magpi-print hin damo nga mga modules an mga teachers”, an pamahayag ni Singh.
Dugang pa ni Singh nga nahimugso ini nga ideya han ma-eksperyensiya nira an pira nga mga problema nga durot han distance learning.
“Danay an mga kag anak nala an nag aanswer han modules. Naco-confirm namon kay pag aabot ha amon iba an agi. Mismo an pagsurat na klaro nga diri kanan bata. Dako an score han bata ha activity sheets, outstanding pero ha dida han face to face nga klase average man la. Nawawara an quality learning. Dagko an ira grado pero waray nababaruan,” dugang nga pamahayag ni Singh.
Gin istorya ini niya ini nga problema ha iya sangkay nga Oquiño ngan dayon nagpatapod ini nga bubuligan hiya.
Ha luyo nga waray hira nakarawat nga pinansyal nga bulig tikang ha gobyerno, ginpadayon ni Singh an mao nga proyekto kon diin nakaaro hira hin donasyon tikang ha usa nga langyawanon nga nagkakantidad hin PHP 70,000.00.
Tungod nga sobra PHP 120,000.00 an kantidad han mao nga proyekto naggawas hin kwarta hi Singh tikang ha iya kalugaringon bursa nga mahapit PHP50,000.00.
“ An iba hini gin utang ko pa, pero kinahanglan namon mag-invest para makaghatag hin de kalidad nga edukasyon. Pano namon ini mabubuhat yana nga pandemic kon waray access an mga bata ha online materials, ngan diri nira nakakaistorya an ira mga teachers?”, kadugangan niya nga pahayag.
Sumala pa hini nga syahan ini nga proyekto ha probinsiya han Samar ngan nagpahayag na hin intensyon an Deped Samar Division nga subdon ini ha iba pa nga parte han probinsiya nga may parehas nga problema.
Nagpatapod naman an eskwelahan nga mamimiling hira hin paagi agud nga matagan liwat hin cellphones an mga estudyante nga nanhuhuram la hin gadgets.
Nag-aro na daw hira hin bulig ha mga pribado nga indibidwal ngan pira han mga ini in nagdonate na hin cellphones.
An mga estudyante liwat nga diri makakagpartisipar ha online learning in tatagan la gihapon han ira kinada semana nga mga modules.
