TACLOBAN CITY – Nagin mahimyang ngan hapsay an gindumara nga demonstrasyon han mga raliyista kakulop nga adlaw, Pebrero 25, ha may Rizal Avenue ngan RTR Plaza, kadungan han paghinumdom han ika-40 katuig han EDSA People Power Revolution.
Sumala kan Abucay Police Station 2 Deputy Chief of Police, PCpt. Nikky Bermudo, duha la nga katitirok an ira namonitor kakulop nga adlaw, ha pagsalin-urog han anibersaryo han People Power, kun diin an syahan in ha sulod RTR Plaza, pasado alas-10 han aga.
Ginbabana-bana nga umabot la ha 50 katawo an nakiusa han katitirok ngan nagin hapsay man an demonstrasyon han mga raliyista; waray gihapon nag-iha an aktibidad nga umabot la hin haros 30 minutos.
An ikaduha nga katitirok in nahitabo ha mga Rizal Avenue, kun diin, ginkaistorya han kapulisan an organizers han katitirok nga hinay-hinay magkalakat mahitungod nga waray hira permit ngan dire igintutugot an pag-rally ha pampubliko nga lugar hin waray katugutan o permit.
Ha kabug-usan in waray may nagin problema ha butnga han kapulisan ngan raliyista mahitungod nga namati man an mga ini. Waray gihapon maapektaran an balaod-trapiko han syudad rason han mas mahimyang nga pagdumara han ira protesta.
Ha kaluyo han kahapsay ngan kahimyang, padayon nga nagbantay an kapulisan han syudad kun diin presente an Tacloban City Police Station 2, Tacloban City Police Office Central Headquarters, sugadman an Quick Response Team (QRT) ngan Civil Disturbance Management (CDM) nga naka-andam gihapon ha oras nga nagkamay-ada hin kasamok.
Nagpasalamat naman an opisyal ha mga raliyista ha pagkipag-kooperar ha kapulisan.
