NATIONAL – Ginpahayag han House prosecution panel nga waray bag-o nga ebidensya ngan puro la “rehashed” o pabalik-balik an 51-kapakli nga baton ni Vice Presidente Sara Duterte para depensahan an iya pwesto hiunong han Articles of Impeachment kontra ha iya.
Sumala kan prosecution spokesperson Rep. Zia Alonto Adiong, puro la pamaagi han balaud ngan pagkuwestiyon han proseso an ginhihimo han grupo han Bise Presidente imbes nga direkta nga batunon o pamatud-an nga sayop an mga akusasyon han korapsyon ngan ma-anomaliya nga paggasta han confidential funds.
Ha iya baton, nanindugan hi Duterte nga waray pulos an kaso tungod kay diri pa pinal an desisyon han COA, waray pruweba nga nagsuhol hiya ha DepEd, ngan “freedom of expression” la an iya seryoso nga anay panarhog ha kinabuhi ni Presidente Marcos.
Yana in padayon an panalimbasog han prosekusyon nga abrihan ha trial an gintatawag nga “BIR box” nga may sulod nga mga tax records ni Duterte agud makit-an han ngatanan kon legal gud ba ngan diin tikang an iya mga karikuhan.
