Tacloban City – Nagtotoo iton Presidente han Eastern Visayas Basketball League ngan anay PBA player nga hi Rey Evangelista nga damo iton mga atleta ha rehiyon nga may potensyal para magin PBA Player.
Ini an nagin pamahayag han beterano nga PBA player ha iya nagin mensahe ha pag abre han Season II hiton Eastern Visayas Baketball League ( EVBL ) han nakalabay nga Marso 3.
Sumala pa haiya an EVBL an magseserbi nga training ground para maipadayon han mga basketball enthusiast an paghurma han ira mga potensyal ngan matagan hira hin exposure agud makuha ha mas hitaas nga liga sugad nala han MPBL ngan PBA.
Mababaruan nga ha mga lokalidad, nagiging aktibo iton usa nga player kon tiarabot iton fiesta kon diin nagkakamay-ada hin mga liga.
Pinaagi han EVBL magpapadayon iton training han mga atleta samtang aada ini nga liga.
Nakakabulig gihapon ini ha pagribhong turismo han usa nga lugar.
Sumala pa kan Evangelista nga padayon gihapon nga ginpapaupay an ira mga pasilidad para ha mas magin maupay pa an kada mulay.
Gin aaghat gihapon hini an mga LGUs nga suportahan an natura nga liga.
Mababaruan nga ha ikaduha nga season han EVBL, unom nga mga teams an magpapaisan -isan kutob ha pagdangat ha championship.
Ini nga mga teams amo an Isabel Goldtown, Tacloban Birch Tree Fortified, Jaro Blades, Ormoc Energizers, Abuyog Stingers ngan Albuera Knights.
