Gin batikos ni House prosecutor ngan Bicol Saro Party-list Rep. Terry Ridon an mga supporters ni Vice President Sara Duterte ha pagprubar nga ‘siraan’ an House prosecution panel ugsa an pagbubuhaton nga impeachment trial ha Senado.
Ginpahayag ini ni Ridon mahuman igdabi han 18 anay sundalo an piras nga magbabalaod, kaupod an mga membro han prosecution team ha daw pagdudul-ong hin mga maleta nga mayda sulod nga salapi ha usa nga pagdungog han Senate Blue Ribbon Committee dida han Hunyo 4.
Sumala kan Ridon, klaro nga panuyo han nasabi nga pagdungog nga magbilin hin pagdududa ha kredibilidad han prosekusyon, pero ginsigurado hini nga dire ini makakapugong ha paglalatag han kamatuuran ha Senate impeachment court.
“Kahit ano pong ibato ng 18 marines at ng kung sino man ho na sumusuporta sa pangalawang pangulo, tuloy po impeachment trial. We will not be deterred,” sumala kan Ridon.
Dugang pa han magbabalaod, andam nira nga igpresenta an ngatanan han madig-on nga ebidensya kontra ha Bise Presidente, kaupod an mga bank account ngan transakyon tikang ha Anti-Money Laundering Council (AMLC).
Maduon nga igindiwara ni Ridon an mga alegasyon kontra ha iya ngan gintagan-duon nga dire bisan san-o nahingaranan an iya ngaran ha orihinal nga affidavit han grupo dida han Pebrero ngan baga-baga hin ginsingit nala ini ha naglabay nga pagdungog.
Na-impeach hi Duterte han Kamara dida han Pebrero ha suporta han 257 nga magbabalaod.
Nakatalaan nga magtikang an pre-trial yana nga bulan ugsa an pormal nga pagdungog ha Hulyo 6, 2026.
