Igindiwara han Department of Budget and Management (DBM) nga gintutuyo hini nga ipiton an pondo para ha mga lokal nga imprastraktura, ha butnga han hulga han National Union Party (NUP) nga bumul-iw ha majority bloc han Kamara.
Imbes nga pamumulitika, gintudlok han DBM nga an mga pagbabag-o nga iginsingit mismo han mga magbabalaod ha 2026 General Appropriations Act (GAA) an nagin rason han conditional release han mga pondo.
Nagtikang an isyu han igpahayag ni NUP Chairman ngan Antipolo City Rep. Ronaldo Puno an pagkadismaya han ira partido kan Speaker Faustino “Bojie” Dy III mahitungod ha dire la gihapon naihahatag nga pondo para ha mga proyekto ha ira mga distrito.
Sumala kan Puno, gin abisuhan hira nga kinahanglan anay mayda magdaog ha bidding han proyekto ugsa magpagawas an DBM hin Special Allotment Release Order (SARO) ha regional director han Department of Public Works and Highways (DPWH).
Pero gin klaro han DBM nga mahugot la nira nga ginsusunod an balaod.
Pag-eksplikar han ahensya, nagsulod an Kongreso hin Congress Introduced Changes and Adjustments (CICA) ha mga locally funded infrastructure (LFI) projects nga igin salawad han Ehekutibo.
Mahitungod nga nabag-o an orihinal nga National Expenditure Program (NEP), an mga pondo para ha nasabi nga proyekto in iginbutang ha ilarom han For Issuance of SARO (FISARO).
Basar ha President’s Veto Message, an mga sugad nga pagbabag-o in nanginginahanglan pa hin kadugangan nga validation ngan clearance tikang ha Office of the President (OP) ugsa maigawas an pondo.
Iginduon gihapon han DBM nga dire sakto an mga akusasyon nga kinahanglan mahuman an bidding ugsa nira aprubahan an pondo.
