TACLOBAN CITY – Pagdudumaraon han City Veterinary Office an mga durudilain nga aktibades para han mga kaayaman kasumpay hiton Rabies Awareness Month yana nga bulan han Marso.
An mga aktibidad nga pagbubuhaton in an deworming o an pagpurga han ayam, dog registration, ngan an mass vaccination para ma kontra iton rabies.
Sumala kan Dra. Eunice Alcantara Head han City Veterinary Office nga ginbuhat nira ine nga pitad para malikayan ngan mapug-ngan an pagkalat han virus nga rabies ha mga ayam.
Kalakip gihapon ha mga aktibidades iton “pakontest” pamaagi hiton Responsible Pet Ownership program kaupod an City Housing Dev, Brgy. Affairs, ngan City Veterinary Office nga may panuyuan nga aghaton an molupyo nga magin responsible dog owners.
Manunumduman nga nahereport nga damo an nadakop nga layaw nga ayam han Dog Impound Team ha pabahay, norte han Tacloban City nga posible an iba hine in carrier han rabies.
Samtang, an mao nga “pakontest” in para masiguro han opisyales han tagsa-tagsa barangay nga waray layaw nga ayam nga makikit-an ha ira lugar ngan naka bantay gihapon an mga tag-iya hiton ira mga alaga, kun diin mayda na 63 homeowners an umapi.
